మహా ఉత్కంఠకు తెర - సీఎంగా దేవేంద్ర పఢ్నవీస్ పేరు ఖరారు.!

మహారాష్ట్ర ముఖ్యమంత్రి ఎవరనే ఉత్కంఠకు తెరపడింది. ఫలితాలు విడుదలై పది రోజులు గడిచినా.. ప్రభుత్వ ఏర్పాటుపై సస్పెన్షన్ కొససాగుతున్న విషయం తెలిసిందే. అయితే, ఎట్టకేలకు ముఖ్యమంత్రి ఎవరనే దానిపై స్పష్టత వచ్చింది. మహారాష్ట్ర సీఎంగా బీజేపీ నేత దేవేంద్ర పఢ్నవీస్ పేరు ఖరారైంది. బుధవారం జరిగిన బీజేపీఎల్పీ సమావేశంలో శాసనసభపక్ష నేతగా ఫడ్నవీస్‌ను ఎమ్మెల్యేలు ఎన్నుకున్నారు. సీఎం పదవి విషయంలో ఏక్‌నాథ్ షిండే బెట్టు వీడటంతో ఫడ్నవీస్‌కు మార్గం సుగమం అయ్యింది.

మహారాష్ట్ర పరిశీలకులుగా వచ్చిన కేంద్ర ఆర్ధిక మంత్రి నిర్మలా సీతారామన్, విజయ్ రూపానీ సమక్షంలో ఎల్పీనేతగా ఫడ్నవీస్‌ను ఏకగ్రీవంగా ఎన్నుకున్నారు. ఈ సందర్భంగా ఫడ్నవీస్‌కు నిర్మలా సీతారామన్ అభినందనలు తెలిపారు. ఫడ్నవీస్ నాయకత్వంలో మహారాష్ట్ర భవిష్యత్తు మారనుందని, ప్రజల నమ్మకాన్ని ఆయన నిలబెడతారని ఆత్మవిశ్వాసం వ్యక్తం చేశారు. ఎన్నికల్లో ప్రజలు స్పష్టమైన తీర్పు ఇచ్చారని అన్నారు. అంతేకాదు, మహారాష్ట్ర అభివృద్ధికి మోదీ ప్రభుత్వం కట్టుబడి ఉందన్నారు.

మహాయుతి కూటమి భారీ విజయం సాధించినా.. సీఎంగా ఎవరు ఉండాలనే విషయంలో మూడు పార్టీల మధ్య ఏకాభిప్రాయం కుదరకపోవడంతో ప్రమాణ స్వీకారం ఆలస్యమైందనే ప్రచారం జరిగింది. ఎన్సీపీ (అజిత్ పవార్) సీఎం పదవి డిమాండ్ చేయకపోయినా, శివసేన (షిండే) మాత్రం తమకు ముఖ్యమంత్రి పదవి కావాలని చివరి వరకు డిమాండ్ చేస్తూ వచ్చింది. సీఎం పదవి ఇవ్వకపోతే తాము కోరుకున్న మంత్రిత్వశాఖలను ఇవ్వాలని అడిగినప్పటికీ షిండే డిమాండ్ల పట్ల బీజేపీ సానుకూలంగా స్పందించలేదని తెలుస్తోంది.

బీజేపీ అధిష్టానం షిండేను ఒప్పించినట్లు సమాచారం. దీంతో ప్రభుత్వ ఏర్పాటుకు సన్నాహాలు జరుగుతున్నాయి. గురువారం మధ్యాహ్నం ముంబయిలోని ఆజాద్ మైదానంలో సీఎంతో పాటు ఇద్దరు డిప్యూటీ సీఎంలు ప్రమాణ స్వీకారం చేయనున్నట్టు తెలుస్తోంది. గతవారం ఢిల్లీలో బీజేపీ నేతలతో సమావేశం అనంతరం ముంబయి చేరుకున్న ఏక్‌నాథ్ షిండే.. తన స్వస్థలానికి వెళ్లిపోవడం మహారాష్ట్ర రాజకీయాల్లో కలకలం రేగింది. ఆయన అనారోగ్యానికి గురైనట్టు ప్రచారం జరిగింది. ఈ క్రమంలో సోమవారం థానేలోని ఆసుపత్రికి వెళ్లి వైద్య పరీక్షలు చేయించుకున్నారు. అనంతరం ఆయన ఫడ్నవీస్‌తో భేటీ అయ్యారు. ఈ సందర్భంగా సీఎం పదవి విషయంలో షిండే వెనక్కి తగ్గి.. ఫడ్నవీస్‌కు మద్దతు తెలిపినట్టు తెలుస్తోంది.