యూకే పార్లమెంట్‌లో సత్కారం -  చిరంజీవి ఎమోషనల్ పోస్ట్..!

టాలీవుడ్ సీనియర్ హీరో మెగాస్టార్ చిరంజీవిని యూకే పార్లమెంట్‌లోని హౌస్‌ ఆఫ్‌ కామన్స్‌ లో ఘనంగా సత్కరించిన సంగతి తెలిసిందే. నాలుగున్నర దశాబ్దాలుగా సినీ రంగానికి, సమాజానికి ఆయన చేసిన సేవలకు గుర్తింపుగా లైఫ్‌ టైమ్ అచీవ్‌మెంట్‌ అవార్డును అందించారు. దీనికి సంబంధించిన వీడియోలు, ఫొటోలు సోషల్ మీడియాలో చక్కర్లు కొడుతున్నాయి. బ్రిటన్‌ పార్లమెంటులో తనకు దక్కిన గౌరవంపై తాజాగా చిరంజీవి స్పందించారు. యూకే పార్లమెంట్‌లోని హౌస్ ఆఫ్ కామన్స్‌లో గౌరవనీయులైన పార్లమెంటు సభ్యులు, మంత్రులు, సెక్రటరీలు, దౌత్యవేత్తలు ఇచ్చిన గౌరవానికి నా హృదయం కృతజ్ఞతతో నిండిపోయింది. టీమ్ బ్రిడ్జ్ ఇండియా అందించిన లైఫ్ టైమ్ అచీవ్‌మెంట్ అవార్డుతో హృదయపూర్వకంగా సంతోషిస్తున్నాను. మాటలు సరిపోవు. నా ప్రయాణానికి అన్ని విధాలుగా సహకరించిన నా అభిమానులు, రక్త సంబంధీకులు, నా సినిమా ఫ్యామిలీ, శ్రేయోభిలాషులు, స్నేహితులు, నా కుటుంబ సభ్యులకు ధన్యవాదాలు. నేను చేస్తున్న మానవతావాద కార్యక్రమాలలో పాల్గొన్న ప్రతి ఒక్కరికీ హృదయపూర్వక ధన్యవాదాలు. ఈ గౌరవం నన్ను మరింత శక్తితో పని చేయడానికి ప్రేరేపిస్తుంది'' అని చిరంజీవి ఎక్స్ లో పోస్ట్ పెట్టారు.

అలానే చిరంజీవి మరో ట్వీట్ చేస్తూ యూకే పార్లమెంట్‌లో జీవిత సాఫల్య పురస్కారం అందించడానికి కారణమైన ప్రతీ ఒక్కరికీ పేరు పేరునా కృతజ్ఞతలు తెలియజేసారు. ఈ సందర్భంగా బ్రిటన్‌ పార్లమెంటులో సత్కారానికి సంబంధించిన ఫోటోలు, అక్కడి ప్రతినిధులతో దిగిన ఫోటోలను కూడా ఎక్స్ లో షేర్ చేసారు. ఇవి ప్రస్తుతం నెట్టింట వైరల్ అవుతున్నాయి. చిరుకి దక్కిన ఈ గౌరవానికి పలువురు సినీ ప్రముఖులు, అభిమానులు సోషల్ మీడియా వేదికగా శుభాకాంక్షలు తెలియజేసారు. ఇంకా మరెన్నో అవార్డులు సాధించాలని కోరుకుంటున్నారు.

ఎలాంటి సినీ బ్యాగ్రౌండ్ లేకుండా సినీ ఇండస్ట్రీలో అడుగుపెట్టిన చిరంజీవి.. తన స్వయంకృషితో ఇండియన్ సినిమాలో హిస్టరీ క్రియేట్ చేసాడు. నాలుగున్నర దశాబ్దాల తన కెరీర్ లో 156 సినిమాల్లో నటించారు. ఎన్నో అవార్డులు, రివార్డులు సొంతం చేసుకున్నారు. 9 ఫిలింఫేర్‌ అవార్డులు, 3 నంది అవార్డులతోపాటు రఘుపతి వెంకయ్య పురస్కారాన్ని సాధించారు. కేంద్ర ప్రభుత్వం 2006లో పద్మభూషణ్‌, 2024లో దేశంలో రెండో అత్యున్నతమైన పద్మ విభూషణ్‌ పురష్కారంతో సత్కరించింది. తన డ్యాన్సులతో గిన్నిస్‌ బుక్‌ ఆఫ్‌ వరల్డ్‌ రికార్డ్స్‌లోకి ఎక్కిన చిరు.. గత ఏడాది ఏఎన్ఆర్ నేషనల్ అవార్డ్ అందుకున్నారు. ఇక సినిమాల విషయానికొస్తే.. ప్రస్తుతం 'విశ్వంభర' అనే సోషియో ఫాంటసీ సినిమాలో నటిస్తున్నారు. వశిష్ఠ దర్శకత్వంలో తెరకెక్కుతున్న ఈ మూవీ రిలీజ్ డేట్ అనౌన్స్ చేయాల్సి ఉంది.