15 ఏళ్లుగా ఆ నొప్పితో బాధపడుతున్నా -  హీరో నాగార్జున..!

టాలీవుడ్ 'కింగ్' అక్కినేని నాగార్జున ఫిట్‌నెస్ గురించి ప్రత్యేకంగా చెప్పనక్కర్లేదు. 66 ఏళ్ల వయస్సు లోనూ ఫిట్ గా కనిపించే ఆయన, గత 15 ఏళ్లుగా ఓ ఆరోగ్య సమస్యతో పోరాడుతున్నట్లు స్వయంగా వెల్లడించారు. తాను తీవ్రమైన మోకాలి నొప్పితో బాధపడుతున్నానని చెప్పి అందరినీ ఆశ్చర్యపరిచారు. ఇటీవల ఓ కార్యక్రమానికి ముఖ్య అతిథిగా హాజరైన నాగార్జున..  మీడియాతో మాట్లాడుతూ ఈ విషయాన్ని వెల్లడించారు. "సుమారు 15 ఏళ్ల క్రితం నాకు మోకాలి నొప్పి మొదలైంది. అప్పటి నుంచి ఈ సమస్యతో బాధపడుతూనే ఉన్నాను. అయితే, ఇప్పటివరకు మోకాలి రీప్లేస్‌మెంట్ సర్జరీ చేయించుకోలేదు. దాన్ని వీలైనంత వరకు వాయిదా వేయాలనే ప్రయత్నం చేస్తున్నానని" ఆయన స్పష్టం చేశారు. మోకాలి నొప్పి నుంచి ఉపశమనం కోసం ల్యూబ్రికెంట్ ఫ్లూయిడ్స్, పీఆర్‌పీ వంటి చికిత్సలు తీసుకున్నట్లు నాగార్జున తెలిపారు. "డాక్టర్ల సహాయంతో మోకాలి లోపల కణజాలం పునరుత్పత్తి అయ్యేలా చూసుకున్నాను. నొప్పి లేని రోజుల్లో కూడా ఉదయాన్నే మోకాలి కోసం ప్రత్యేకంగా రిహాబ్ చేసేవాడిని. నిరంతరం దానిపై దృష్టి పెట్టానని" తన క్రమశిక్షణ వెనుక ఉన్న కష్టాన్ని వివరించారు. ప్రస్తుతం తన ఆరోగ్యం బాగానే ఉందని, అయితే సర్జరీని మాత్రం వద్దనుకుంటున్నానని ఆయన తేల్చి చెప్పారు. నాగార్జున వ్యాఖ్యలతో ఆయన ఫిట్‌నెస్ వెనుక ఎంతటి క్రమశిక్షణ, పట్టుదల ఉన్నాయో అర్థమవుతోందని అభిమానులు సోషల్ మీడియాలో కామెంట్లు చేస్తున్నారు. ఆయన ఆరోగ్య స్పృహ, నిబద్ధత అందరికీ ఆదర్శమని ప్రశంసిస్తున్నారు.