రైల్వేశాఖ గుడ్ న్యూస్ - కుప్పంలో ఇక ఆ రెండు రైళ్లకూ స్టాపింగ్ అవకాశం

ఏపీలో కూటమి ప్రభుత్వం అధికారంలోకి వచ్చాక రైల్వేశాఖ నుంచి కీలక ప్రతిపాదనలకు ఆమోదముద్ర వేయించుకుంటున్న చంద్రబాబుకు ఇప్పుడు మరో గుడ్ న్యూస్ అందింది. అదీ తన సొంత నియోజకవర్గం కుప్పంలో తాను చేసిన ఓ ప్రతిపాదనకు రైల్వే మంత్రి ఆమోదం తెలుపుతూ తాజాగా లేఖ రాశారు. దీంతో కుప్పం వాసులకు ఇక ప్రయాణాల కష్టాలు తీరినట్లేనని భావిస్తున్నారు. చిత్తూరు జిల్లా కుప్పం రైల్వే స్టేషన్ లో రెండు ఎక్స్ ప్రెస్ రైళ్లకు హాల్ట్ ఇస్తూ రైల్వే శాఖ కీలక నిర్ణయం తీసుకుంది. ఇందులో వాస్కోడగామా - వేలంకణి మధ్య నడిచే ఎక్స్ ప్రెస్ రైలుతో పాటు దాదర్ సెంట్రల్-పాండిచ్చేరి ఎక్స్ ప్రెస్ రైలుకు కూడా స్టాప్ లు ఇచ్చారు. ఈ రెండు రైళ్లకూ కుప్పం రైల్వే స్టేషన్ లో నిలుపుదల చేసేందుకు ఆమోదం తెలుపుతూ రైల్వే మంత్రి అశ్వినీ వైష్ణవ్ సీఎం చంద్రబాబుకు స్వయంగా లేఖ రాశారు.

ఈ నెల 10 తేదీన ఢిల్లీలో కేంద్ర మంత్రి అశ్వినీ వైష్ణవ్ ను సీఎం చంద్రబాబు కలిశారు. కుప్పం రైల్వే స్టేషన్ లో ఈ రెండు ఎక్స్ ప్రెస్ రైళ్లకు స్టాపులు ఇవ్వాలని చంద్రబాబు ఆయన్ను కోరారు. దీనిపై రైల్వే అధికారులతో మాట్లాడిన మంత్రి అశ్వినీ వైష్ణవ్.. సాధ్యాసాధ్యాలు పరిశీలించి చివరికి ఆమోదం తెలిపారు. ఈ మేరకు కుప్పం వాసులు ఇకపై ఈ రెండు రైళ్లలోనూ ప్రయాణాలు చేసేందుకు వీలు కలిగింది. అలాగే తన నియోజకవర్గం కుప్పానికి కేంద్రం నుంచి చంద్రబాబు ఓ వరం సాధించుకున్నట్లయింది. దీనిపై కుప్పం వాసుల్లో హర్షం వ్యక్తమవుతోంది.