తిరువూరు నియోజకవర్గంలో రోడ్డు పనులు ప్రారంభం - సంతోషంతో స్టెప్పులేసిన ఎమ్మెల్యే

ఎన్టీఆర్ జిల్లాలోని తిరువూరులో ఇప్పుడు కొత్త రాజకీయం నెలకొంది. గత మూడు నాలుగు నెలలుగా రాజకీయ ఆధిపత్య పోరుతో వార్తల్లో నిలిచిన తిరువూరు నియోజకవర్గం ఈ సారి మాత్రం అభివృద్ధి పనుల విషయమై వార్తల్లో కెక్కింది. సంక్రాంతికి రోడ్లు అన్నీ పూర్తి చేయాలని లక్ష్యంగా పెట్టుకున్న కూటమి ప్రభుత్వం 175 నియోజకవర్గాల్లో దాదాపు పనులన్నీ పూర్తి చేసింది. ఇందులో భాగంగానే తిరువూరులో తెలంగాణ రాష్ట్రానికి కూడా అనుసంధానమైన ప్రధాన రోడ్డు పనులకు శంకుస్థాపన చేసింది.

తిరువూరు బస్టాండ్ నుండి సూర్య రెస్టారెంట్ వెళ్లే ప్రధాన రహదారి చాలా అధ్వానంగా ఉండేది. ముఖ్యంగా తెలంగాణ రాష్ట్రానికి కూడా అనుసంధానమైన రోడ్డు ఇది. గత పది సంవత్సరాలుగా అధికారులు, పాలకులు పట్టించుకోకపోవడంతో రోడ్డు పూర్తిగా ధ్వంసమైంది. రోడ్డుపై పెద్ద పెద్ద గుంటలు ఏర్పడి ప్రయాణించాలంటే వాహనదారులకు ప్రాణ సంకటంగా మారింది. ఎంతోమంది వాహనాలు గుంటల్లో పడి కాళ్లు చేతులు విరిగి ఆసుపత్రుల పాలై నరకయాతన అనుభవించారు కూడా. ఎట్టకేలకు ఈ రోడ్డుకు మోక్షం కలిగింది. బస్టాండ్ నుండి సూర్యా రెస్టారెంట్ వరకు వెళ్లే రోడ్డుకు రాష్ట్ర ప్రభుత్వం నిధులు మంజూరు చేయటంతో ఎమ్మెల్యే కొలికపూడి శ్రీనివాసరావు  పంచాయతీరాజ్ శాఖ అధికారులతో కలిసి రోడ్డుకు శంకుస్థాపన చేసి పనులు ప్రారంభించారు. ఈ సందర్భంగా సంతోషంతో డ్యాన్స్ చేశారు. ఎప్పుడూ వివాదాస్పద అంశాలు మాట్లాడి రచ్చకు తెరలేపే కొలికపూడి సరదాగా డ్యాన్స్ చేయడంతో కార్యకర్తలు ఆశ్చర్యపోయారు. తనదైన శైలిలో ముక్కుసూటిగా వెళ్లే ఎమ్మెల్యే కొలికపూడి.. శంకుస్థాపన కార్యక్రమంలో చిన్న పిల్లాడితో కలిసి డ్యాన్స్ చేయడంతో ఆయనలో మార్పు వచ్చిందని.. రాజకీయ హీట్ ను పక్కన పెట్టి.. నియోజకవర్గ అభివృద్ధిపై ఫోకస్ చేశారని టాక్ వినిపిస్తోంది. ఈ సందర్భంగా ఎమ్మెల్యే కొలికపూడి మాట్లాడుతూ.. తిరువూరు నియోజకవర్గంలో పాడైపోయిన రోడ్లను త్వరలోనే బాగు చేస్తామని తెలిపారు. త్వరలోనే కోకిలంపాడు రోడ్డు పనులు ప్రారంభిస్తామని ఎమ్మెల్యే హామీ ఇచ్చారు. తిరువూరు నియోజకవర్గంలో రోడ్ల మరమ్మతులకు నిధులు కేటాయించినందుకు ముఖ్యమంత్రి చంద్రబాబు నాయుడుకు ఆయన కృతజ్ఞతలు తెలిపారు.