ఛీ, ఛీ.. ఈ రేంజ్‌కి అమ్ముకోవడమా - పవన్ కళ్యాణ్‌కు ప్రకాష్ ఘాటు రిప్లై..!

ఏపీ డిప్యూటీ సీఎం పవన్ కళ్యాణ్‌పై మరోసారి విరుచకుపడ్డారు నటుడు ప్రకాష్ రాజ్.. ఈసారి కాస్త ఘాటుగానే టార్గెట్ చేశారు. హిందీ భాషపై పవన్ కళ్యాణ్ చేసిన వ్యాఖ్యలకు గట్టిగానే కౌంటర్ ఇచ్చారు. పవన్ కళ్యాణ్ హైదరాబాద్ గచ్చిబౌలిలోని జీఎంసీ బాలయోగి స్టేడియంలో ఏర్పాటు చేసిన రాజ్య భాషా విభాగం గోల్డెన్‌ జూబ్లీ వేడుకలకు హాజరయ్యారు. అక్కడ హిందీ భాషపై ఆసక్తికర వ్యాఖ్యలు చేశారు. 'మన మాతృభాష అమ్మ అయితే హిందీ పెద్దమ్మ. హిందీ మనది .. ఆ భాషను ప్రేమిద్దాం అని, ముందుకు తీసుకెళ్దాము' అంటూ వ్యాఖ్యానించారు. ఈ వీడియోను ట్వీట్ చేసి.. 'ఈ range కి అమ్ముకోవడమా ….ఛి…ఛీ…' అంటూ ఘాటుగా స్పందించారు. పవన్ కళ్యాణ్‌ను ఘాటుగా విమర్శించారు.

ప్రస్తుత రోజుల్లో విద్య, ఉద్యోగం, వ్యాపారం కోసం భాషతో సంబంధం లేకుండా అందరూ ముందుకెళ్తున్నారని పవన్ కళ్యాణ్ వ్యాఖ్యానించారు. ఈ సమయంలో హిందీని గుడ్డిగా వ్యతిరేకించడం సరికాదని..అలా చేస్తే భవిష్యత్తు తరాల అభివృద్ధిని అడ్డుకున్నట్లే అవుతుందన్నారు. హిందీలో డబ్ అయిన సౌత్ ఇండియన్ సినిమాలు 31 శాతం ఆదాయం తెచ్చిపెడుతున్నాయన్నారు. వ్యాపారానికి హిందీ అవసరం అయినప్పుడు, నేర్చుకోవడానికి ఎందుకు ఇబ్బంది పడాలన్నారు. హిందీ నేర్చుకుంటే మన ఉనికిని కోల్పోమని, మరో భాషను అంగీకరిస్తే ఓడిపోయినట్లు కాదని, కలిసి ప్రయాణం చేయడమన్నారు. 'ఆంగ్ల భాషను సొంతం చేసుకున్న మనం, హిందీని మన భాషగా ఎందుకు అనుకోవడం లేదు. ఉద్యోగాల కోసం ఇతర దేశాలకు వెళ్ళినప్పుడు అక్కడి భాషలు నేర్చుకుంటున్నాము.. మరి మన దేశానికి చెందిన హిందీ నేర్చుకోవడానికి ఎందుకు భయపడుతున్నాము. హిందీ నేర్చుకోవాలని ఎవరినీ బలవంతం చేయడం లేదని' పవన్ కళ్యాణ్ అన్నారు.

'కొందరు లాభం ఉందనుకున్నప్పుడు హిందీని వాడుకుంటారు. కానీ రాజకీయాల కోసం వ్యతిరేకిస్తారు. ఇంట్లో మాట్లాడుకోవడానికి మాతృభాష ఉంటే, బయట మాట్లాడటానికి హిందీ అవసరం అవుతుంది. మనం విడిపోయే దారులు వెతుకుతుంటే, హిందీ దేశాన్ని కలిపే దారులు వెతుకుతోంది, అందుకే నేను హిందీని స్వాగతిస్తున్నాను. హిందీ నేర్చుకోవడం అంటే మన ఉనికిని కోల్పోవడం కాదు.. మరింత బలంగా చేసుకోవడమని' అన్నారు పవన్ కళ్యాణ్. ఈ వ్యాఖ్యలకు ప్రకాష్ రాజ్ కౌంటర్ ఇచ్చారు. అయితే ప్రకాష్ రాజ్ ట్వీట్‌కు జనసైనికులతో పాటుగా పలువురు నెటిజన్లు కూడా గట్టిగానే కౌంటరిస్తున్నారు. 'నువ్వన్నట్టే వ్యక్తులు నిజంగా మిగిలిన భాషలను ద్వేషించుకుంటూ పోతే నువ్వు ఇన్ని సినిమాలు చేసేవాడివా.. ఇంత సంపాదించేవాడివా.. జాతీయ స్థాయిలో నువ్వింత గొప్ప పేరు తెచ్చుకునేవాడివా .. ఇంత జీవితం చూసేవాడివా ప్రకాష్ రాజ్ అన్నా?' అంటూ ఒక జన సైనికుడు కౌంటర్ ఇచ్చారు.