చెవిరెడ్డికి హైకోర్టులో షాక్ - పోక్సో కేసులో ఇక అరెస్టు తప్పదా..?

ఏపీలో వైసీపీ మాజీ ఎమ్మెల్యే చెవిరెడ్డి భాస్కర్ రెడ్డికి ఇవాళ మరో ఎదురుదెబ్బ తగిలింది. చిత్తూరు జిల్లాలో ఇటీవల ఒక బాలికపై దాడి జరగ్గా... దాన్ని లైంగిక దాడిగా పేర్కొంటూ కూటమి ప్రభుత్వంలో బాలికలకు, మహిళలకు భద్రత లేదని విమర్శించే ప్రయత్నం చేశారు. ఈ వ్యవహారంలో చెవిరెడ్డి భాస్కర్ రెడ్డి పై పోలీసులు కేసు నమోదు చేసి దర్యాప్తు చేస్తున్నారు. అయితే ఈ కేసులో ఆయన్ను అరెస్ట్ చేసే అవకాశం ఉండటంతో చెవిరెడ్డి హైకోర్టును ఆశ్రయించారు. ఈ క్రమంలో పోలీసులు తనపై నమోదు చేసిన పోక్సో కేసును కొట్టేయాలని చెవిరెడ్డి హైకోర్టులో పిటిషన్ దాఖలు చేశారు. తాను చేసిన వ్యాఖ్యలు పోక్సో చట్టం కిందకు రావని ఆయన వాదిస్తున్నారు. దీనిపై హైకోర్టులో ఇవాళ విచారణ జరిపిన హైకోర్టు..   పోలీసులు తనను అరెస్టు చేయకుండా మధ్యంతర ఉత్తర్వులు ఇవ్వాలన్న చెవిరెడ్డి విజ్ఞప్తిని పట్టించుకోలేదు. చెవిరెడ్డి చేసిన విజ్ఞప్తిపై మధ్యంతర ఉత్తర్వులు ఇచ్చేందుకు నిరాకరించింది. పోలీసుల్ని చెవిరెడ్డి పిటిషన్ పై కౌంటర్ దాఖలు చేయాలని ఆదేశాలు ఇచ్చింది. దీంతో చెవిరెడ్డిని పోలీసులు అరెస్టు చేసేందుకు అవకాశం దొరికింది. హైకోర్టు ఆదేశాలపై చెవిరెడ్డి ఎలా స్పందిస్తారన్నది ఇప్పుడు కీలకంగా మారింది. దీని ఆధారంగా పోలీసులు కూడా తదుపరి చర్యలు తీసుకోనున్నారని తెలుస్తోంది.