కర్నూలు బస్సు అగ్నిప్రమాదం కేసులో కీలక పరిణామం - కావేరి ట్రావెల్స్ యజమాని అరెస్టు - విడుదల

తెలుగు రాష్ట్రాల్లో తీవ్ర విషాదాన్ని నింపిన కర్నూలు బస్సు అగ్నిప్రమాదం కేసులో పోలీసులు దర్యాప్తు ముమ్మరం చేశారు. ఈ ఘటనలో ప్రధాన నిందితుల్లో ఒకరైన వేమూరి కావేరి ట్రావెల్స్ యజమాని వేమూరి వినోద్ కుమార్‌ను కర్నూలు పోలీసులు శుక్రవారం అరెస్ట్ చేశారు. అనంతరం కోర్టులో హాజరుపరచగా, ఆయనకు బెయిల్ మంజూరు కావడంతో వెంటనే విడుదలయ్యారు. గత నెల అక్టోబర్ 24న హైదరాబాద్ నుంచి బెంగళూరు వెళ్తున్న కావేరి ట్రావెల్స్‌కు చెందిన బస్సు ప్రమాదానికి గురైంది. కర్నూలు జిల్లా ఉలిందకొండ మండలం చిన్నటేకూరు వద్ద రోడ్డుపై ఆగి ఉన్న ఓ బైక్‌ను బస్సు ఢీకొట్టడంతో ఒక్కసారిగా మంటలు చెలరేగాయి. ఈ ఘోర దుర్ఘటనలో 19 మంది ప్రయాణికులు సజీవ దహనమయ్యారు. ఈ ఘటనపై ప్రమాదం నుంచి బయటపడిన రమేష్ అనే ప్రయాణికుడు ఇచ్చిన ఫిర్యాదుతో పోలీసులు కేసు నమోదు చేశారు. ఈ కేసులో బస్సు డ్రైవర్ మిర్యాల లక్ష్మయ్యను A1 నిందితుడిగా చేర్చి ఇప్పటికే అరెస్ట్ చేశారు. తాజాగా, బస్సు యజమాని వేమూరి వినోద్ కుమార్‌ను A2 నిందితుడిగా పేర్కొంటూ అరెస్ట్ చేశారు. అనంతరం ఆయన్ను స్పెషల్ మొబైల్ కోర్టులో హాజరుపరిచారు. విచారణ జరిపిన న్యాయమూర్తి, రూ.10 వేల సొంత పూచీకత్తుపై వినోద్ కుమార్‌కు బెయిల్ మంజూరు చేస్తూ ఆదేశాలు జారీ చేశారు. కాగా, ప్రమాదానికి గురైన బస్సు విషయంలో యాజమాన్యం నిబంధనలు ఉల్లంఘించినట్లు తీవ్ర ఆరోపణలు ఉన్నాయి. సీటింగ్ పర్మిషన్ ఉన్న బస్సును అక్రమంగా స్లీపర్ కోచ్‌గా మార్చి నడిపినట్లు అధికారులు గుర్తించారు. ఈ కోణంలో దర్యాప్తు కొనసాగుతోంది. ఇలాంటి దుర్ఘటనలు పునరావృతం కాకుండా రవాణా శాఖ అధికారులు కఠిన నిబంధనలు అమలు చేయాలని నిపుణులు అభిప్రాయపడుతున్నారు.