బనకచర్ల వల్ల ఏ రాష్ట్రానికీ నష్టం ఉండదు - నిమ్మల ప్రజెంటేషన్

బనకచర్ల ప్రాజెక్టుపై తెలంగాణలో రాజకీయ కారణాలతోనే విమర్శలు చేస్తున్నారని ఏపీ మంత్రి నిమ్మల రామానాయుడు అన్నారు. సముద్రంలోకి వృధాగా పోయే నీటిని మళ్లించుకునేందుకే ప్రాజెక్టు నిర్మిస్తున్నారని.. ఏ రాష్ట్రానికీ నష్టం ఉండదని స్పష్టం చేశారు.  అమరావతిలో  ప్రాజెక్టు గురించి వివరించారు.  మూడు సెగ్మెంట్‌లుగా బనకచర్ల నిర్మాణం జరుగుతుందని నిమ్మల తెలిపారు. పోలవరం నుంచి ప్రకాశం బ్యారేజీ వరకు మొదటి సెగ్మెంట్,  ప్రకాశం బ్యారేజీ నుంచి బొల్లాపల్లి రిజర్వాయర్ వరకు రెండో సెగ్మెంట్,  బొల్లాపల్లి నుంచి బనకచర్ల వరకు మూడో సెగ్మెంట్ నిర్మాణం జరుగుతుందన్నారు. 

బనకచర్ల ప్రాజెక్టుపై వాస్తవాలు  ప్రజలకు తెలియాలన్నారు.  గత 50 ఏళ్లుగా గోదావరి నీరు వృధాగా 3000 టీఎంసీల నీరు సముద్రంలో కలుస్తోందని, ఇందులో 200 టీఎంసీల నీరు ఉపయోగించి బనకచర్లకు తరలించాలనేదే ఈ ప్రాజెక్ట్ నిర్మాణ ఉద్దేశమని  స్పష్టం చేశారు.  ఈ ప్రాజెక్టు ఎగువ రాష్ట్రాలకు ఎలాంటి నష్టం కలిగించదని, తెలంగాణ నేతలు చేస్తున్న వ్యతిరేక ప్రచారం అసత్యమని ఆయన స్పష్టం చేశారు. అటవీ, పర్యావరణ అనుమతులపై దృష్టి సారించడంతో పాటు, భూసేకరణ కోసం కసరత్తు జరుగుతున్నట్లు వెల్లడించారు. నదుల అనుసంధానం కరవు సమస్యకు పరిష్కారమని, ఈ విషయాన్ని తెలంగాణ నేతలు, ప్రజలు అర్థం చేసుకోవాలని కోరారు. గోదావరి నది నుండి ప్రతి సంవత్సరం సముద్రంలోకి వృథాగా పోతున్న సుమారు 3,000 టీఎంసీల నీటిలో 200 టీఎంసీలను ఈ ప్రాజెక్టు ద్వారా బనకచర్లకు తరలించి, సాగు, తాగునీటి అవసరాల కోసం ఉపయోగించనున్నారు. ఇది రాష్ట్రంలోని పలు ప్రాంతాలకు సాగునీటి సౌకర్యాన్ని మెరుగుపరచడంతో పాటు, భూగర్భ జలాలను పెంచడంలో సహాయపడుతుందని ఆయన వివరించారు.

ఈ ప్రాజెక్టు రెండు రాష్ట్రాలకు ప్రయోజనకరమని, నదుల అనుసంధానం ద్వారా నీటి వనరులను సమర్థవంతంగా ఉపయోగించవచ్చని పేర్కొన్నారు.  ఈ ప్రాజెక్టు కోసం అవసరమైన అటవీ, పర్యావరణ అనుమతులపై ప్రభుత్వం దృష్టి సారించినట్లు తెలిపారు. అటవీ శాఖ, కేంద్ర పర్యావరణ మంత్రిత్వ శాఖలతో చర్చలు జరుగుతున్నాయని, త్వరలో అనుమతులు పొందే అవకాశం ఉందని ఆయన ఆశాభావం వ్యక్తం చేశారు. అలాగే, ప్రాజెక్టు కోసం భూసేకరణ ప్రక్రియ కూడా ప్రారంభమైందని, రైతులతో సంప్రదింపులు జరుపుతూ, న్యాయమైన పరిహారం అందించేలా చర్యలు తీసుకుంటున్నామని చెప్పారు. ఈ ప్రాజెక్టు పూర్తయితే, రాయలసీమ, కోస్తాంధ్రలోని కరువు పీడిత ప్రాంతాలకు సాగునీరు అందుతుందన్నారు. ఈ ప్రాజెక్టు గురించి ప్రజల్లో అవగాహన కల్పించేందుకు. ప్రభుత్వం తరపున పలు కార్యక్రమాలు చేపట్టనున్నట్లు తెలిపారు. తప్పుడు ప్రచారాన్ని నమ్మవద్దని, ప్రభుత్వం అందించే సమాచారాన్ని ఆధారంగా చేసుకోవాలని ప్రజలను కోరారు.