రాజ్యసభలో వైసీపీకి షాక్ - జూన్‌లో కూటమికి మరో నాలుగు రాజ్యసభ స్థానాలు..!

వైసీపీకి పార్లమెంటు ఎగువ సభ అయిన రాజ్యసభలో ప్రాతినిధ్యం భారీగా తగ్గనుంది. జూన్ నెలలో ఆ పార్టీకి చెందిన ముగ్గురు రిటైర్ అవుతున్నారు. ఆంధ్రప్రదేశ్ నుంచి రాజ్యసభకు ప్రాతినిధ్యం వహిస్తున్న నలుగురు సభ్యుల పదవీ కాలం జూన్ నెలతో ముగియనుంది. ఈ ఖాళీలను భర్తీ చేయడానికి ఏప్రిల్‌లోనే ఎన్నికలు పెట్టే అవకాశం ఉంది. ప్రస్తుతం అసెంబ్లీలో ఉన్న బలాబలాల ప్రకారం, ఈ నాలుగు స్థానాలు క్లీన్ స్వీప్‌గా అధికార తెలుగుదేశం-జనసేన-బీజేపీ కూటమి ఖాతాలోకి వెళ్లడం ఖాయమైంది. దీంతో రాజ్యసభలో వైసీపీ బలం కేవలం నాలుగు స్థానాలకే పరిమితం కానుంది. ఒకప్పుడు 11 స్థానాలతో బలంగా ఉన్న వైసీపీ, వరుసగా సభ్యుల రాజీనామాలు, పదవీ కాలం ముగియడంతో ఇప్పుడు నామమాత్రపు శక్తిగా మారుతోంది.

ఈ నాలుగు స్థానాలు ఎవరికి దక్కుతాయనే అంశంపై అమరావతిలో జోరుగా చర్చ సాగుతోంది. పొత్తు ధర్మం ప్రకారం, నాలుగు స్థానాల్లో తెలుగుదేశం పార్టీ కనీసం రెండు లేదా మూడు స్థానాలను దక్కించుకునే అవకాశం ఉంది. మిగిలిన ఒక స్థానాన్ని జనసేనకు కేటాయించే ఛాన్స్ ఉంది. అయితే, కేంద్రంలో ఉన్న సమీకరణాల దృష్ట్యా భారతీయ జనతా పార్టీ కూడా ఒక స్థానాన్ని ఆశించే అవకాశం లేకపోలేదు. ముఖ్యమంత్రి చంద్రబాబు నాయుడు, పవన్ కళ్యాణ్ కలిసి అగ్రనేతలతో చర్చించి తుది నిర్ణయం తీసుకోనున్నారు. టీడీపీ నుంచి సీనియర్ నేతలు, గత ఎన్నికల్లో టికెట్ త్యాగం చేసిన వారు ఈ పదవిపై ఆశలు పెట్టుకున్నారు. ముఖ్యంగా పార్టీ కోసం సుదీర్ఘ కాలంగా పనిచేస్తున్న సీనియర్లు, సామాజిక సమీకరణాల్లో కీలకమైన నేతల పేర్లు పరిశీలనలో ఉన్నాయి.

దేవినేని ఉమ, గల్లా జయదేవ్, చింతకాయల విజయ్, మహాసేన రాజేశ్, ఇలా చాలా మంది పేర్లు ప్రచారంలోకి వస్తున్నాయి. జనసేన నుంచి ఆ పార్టీ కీలక నేతలకు లేదా అధినేత పవన్ కళ్యాణ్ సూచించిన వ్యక్తికి అవకాశం దక్కవచ్చు. ఈ నాలుగు సీట్లూ కూటమికి దక్కడం వల్ల, కేంద్రంలో ఎన్డీయే బలం మరింత పెరగడమే కాకుండా, రాష్ట్ర ప్రయోజనాల కోసం పార్లమెంటులో గళం విప్పే అవకాశం లభిస్తుంది.  గతంలో వైసీపీ తరపున ఎన్నికైన మోపిదేవి వెంకటరమణ, ఆర్. కృష్ణయ్య వంటి నేతలు రాజీనామా చేయడం ఆ పార్టీకి ఇప్పటికే పెద్ద దెబ్బ తగిలింది. ఇప్పుడు పదవీ కాలం ముగియడం వల్ల సహజంగానే స్థానాలు తగ్గిపోతున్నాయి. అసెంబ్లీలో కేవలం 11 మంది ఎమ్మెల్యేలు మాత్రమే ఉండటంతో, వైసీపీ కనీసం ఒక్క స్థానాన్ని కూడా గెలుచుకునే పరిస్థితి లేదు. దీనివల్ల జాతీయ రాజకీయాల్లో ఆ పార్టీ ప్రభావం గణనీయంగా తగ్గిపోనుందని రాజకీయ విశ్లేషకులు అంటున్నారు.