నిబంధనలు ఉల్లంఘిస్తే కఠిన చర్యలు -  విజయవాడ సీపీ రాజశేఖరబాబు హెచ్చరిక

ప్రపంచవ్యాప్తంగా న్యూ ఇయర్ వేడుకలు జరుపుకునేందుకు ప్రజలు సిద్ధమయ్యారు. తెలుగు రాష్ట్రాల్లో కూడా కొత్త సంవత్సరానికి స్వాగతం పలికేందుకు ఏర్పాట్లు జరుగుతున్నాయి. ఈ క్రమంలో పోలీసులు కూడా అలర్ట్ అయ్యారు.. న్యూ ఇయర్ సెలబ్రేషన్స్ వేళ ఎలాంటి అవాంఛనీయ సంఘటనలు జరగకుండా పటిష్టమైన చర్యలు తీసుకుంటున్నారు. డిసెంబర్ 31 అర్ధరాత్రి జరిగే న్యూ ఇయర్ వేడుకలపై పలు ఆంక్షలు విధించినట్లు విజయవాడ నగర పోలీస్ కమిషనర్ రాజశేఖర్ బాబు తెలిపారు. నగరంలో అన్ని ఫ్లైఓవర్లను, ప్రధాన రహదారులను జనవరి 13వ తేదీ వరకు రాత్రిపూట మూసివేస్తున్నామన్నారు. రోడ్లపై అర్ధరాత్రి న్యూ ఇయర్ వేడుకలు నిర్వహించడాన్ని పూర్తిగా నిషేధించామన్నారు. మద్యం తాగి వాహనాలు నడిపే వారిపై కఠినంగా వ్యవహరిస్తామన్నారు.

న్యూ ఇయర్ వేడుకల సందర్భంగా, రాత్రి వేళల్లో విజయవాడ బెంజ్ సర్కిల్ మరియు కనకదుర్గ ఫ్లైఓవర్లను పూర్తిగా మూసివేయనున్నట్లు సీపీ తెలిపారు. కొత్త సంవత్సరం సందర్భంగా ప్రజలు ఎలాంటి ఇబ్బందులు పడకుండా.. శాంతిభద్రతలను కాపాడేందుకు ఈ నిర్ణయాలు తీసుకున్నామన్నారు. ముఖ్యంగా యువత ఎక్కువగా గుంపులుగా చేరి కేకులు కట్ చేయడం, వాహనాలతో హడావిడి చేయడం వంటివి చేస్తుంటారు. అలాంటి వాటిని అరికట్టడానికే ఈ ఆంక్షలు విధించామన్నారు. రాత్రి సమయంలో వాహనాల రద్దీని తగ్గించడానికి, ప్రమాదాలు జరగకుండా నివారించడానికి ఫ్లైఓవర్లను మూసివేస్తున్నారు. అలాగే, మద్యం తాగి వాహనాలు నడిపే వారిని గుర్తించి, వారిపై చట్టపరమైన చర్యలు తీసుకోవడానికి ప్రత్యేక తనిఖీలు నిర్వహిస్తారు. ఈ తనిఖీలు అర్థరాత్రి నుంచే ప్రారంభమవుతాయి. ఎవరైనా ఈ నిబంధనలను ఉల్లంఘించి, ఇబ్బందులు సృష్టిస్తే వారిపై కేసులు నమోదు చేసి, చట్ట ప్రకారం శిక్ష పడేలా చూస్తామని స్పష్టం చేశారు. వాహనాల సైలెన్సర్లు తీసి శబ్దం చేసేలా నడిపేవారిపైనా కఠిన చర్యలు తీసుకుంటారు. ప్రజలందరూ సహకరించి, కొత్త సంవత్సరాన్ని ప్రశాంతంగా జరుపుకోవాలని కోరారు.

డిసెంబర్ 31వ తేదీ రాత్రి నగరంలో భద్రతను కట్టుదిట్టం చేస్తున్నామన్నారు సీపీ. మద్యం తాగి ఎవరైనా గొడవలు చేస్తే కఠిన చర్యలు తీసుకుంటామని హెచ్చరించారు. అలాగే, బైక్‌లపై ప్రమాదకరమైన విన్యాసాలు చేసేవారిపై కూడా చట్టపరమైన చర్యలుంటాయని స్పష్టం చేశారు. అర్ధరాత్రి సమయంలో బాణాసంచా కాల్చడం వంటి పనులు చేయవద్దని, ముఖ్యంగా యువత ఈ విషయంలో అప్రమత్తంగా ఉండాలని పోలీసు అధికారులు కోరుతున్నారు. న్యూ ఇయర్ వేడుకల సందర్భంగా యువత బైక్‌లను అతివేగంగా నడపడం, అజాగ్రత్తగా వ్యవహరించడం, ముగ్గురు కలిసి ఒకే బైక్‌పై ప్రయాణించడం (త్రిబుల్ రైడింగ్) వంటి కారణాల వల్ల అనేక ప్రమాదాలు జరుగుతున్నాయి. ఈ ప్రమాదాలను నివారించేందుకు పోలీసులు ముందస్తు చర్యల్లో భాగంగా ఈ ఆంక్షలను అమలు చేస్తున్నారు.