లడ్డూ కల్తీపై వైసీపీ డైవర్షన్ పాలిటిక్స్ చేస్తోంది - ముద్రగడ కుమార్తె ఫైర్..!

ఏపీలో తిరుమల లడ్డూ కల్తీ వివాదంపై సిట్ రిపోర్ట్ తర్వాత రాజకీయాలు వేగంగా మారుతున్నాయి. సిట్ రిపోర్ట్ తర్వాత జంతువుల కొవ్వు కలిసిందన్న చంద్రబాబు, పవన్ గత వ్యాఖ్యల్ని వైసీపీ తప్పుబడుతుంటే.. కల్తీ జరిగిందని తేలాక కూడా ఈ దబాయింపులేంటని కూటమి ప్రశ్నిస్తోంది. ఇదే క్రమంలో వైసీపీ నేత అంబటి చంద్రబాబును తిట్టడం, దీనిపై పోలీసులు ఆయన్ను అరెస్టు చేసి రిమాండ్ కు పంపడం జరిగిపోయాయి. ఇది కాస్త కాపు రాజకీయం రంగు పులుముకుంది.

ఈ నేపథ్యంలో కాపు నేత ముద్రగడ పద్మనాభరెడ్డి కుమార్తె, జనసేన నేత క్రాంతి బార్లపూడి .. వైసీపీ చేస్తున్న కాపు రాజకీయాలపై తీవ్ర విమర్శలు చేస్తూ ట్వీట్ చేశారు. ఇందులో లడ్డూ కల్తీ అయిందని సీబీఐ చెప్పినా క్లీన్ చిట్ ఇచ్చేసినట్లు వైసీపీ హడావిడి చేస్తోందన్నారు. 60 లక్షల కిలోల నెయ్యి భయంకరమైన రసాయనాలతో తయారయ్యిందని తేల్చారని, ఈ రసాయనాల్లో చౌకగా దొరికే జంతువుల కొవ్వు కాకుండా ఇంకేముంటుందని ప్రశ్నించారు. దీన్ని దారి మళ్లించడం కోసమే అంబటి, జోగి రమేశ్ తో చంద్రబాబును తిట్టించి రాజకీయ ప్రయోజనం పొందాలని వైసీపీ చూసిందన్నారు.

జగన్ పాలనలో రాష్ట్రం 20 ఏళ్లు వెనక్కి వెళ్తే చంద్రబాబు వచ్చాక పోలవరం, అమరావతి పనులు ముందుకెళ్తున్నాయని క్రాంతి తెలిపారు. దీనికి తోడు పెట్టుబడులు కూడా వస్తున్నాయన్నారు. పవన్ కూడా పంచాయతీరాజ్ శాఖను పరుగులు తీయిస్తున్నారని, కుంకీ ఏనుగులు తెప్పించి,మన్యంలో రోడ్లు వేయించి, 13 వేల పంచాయతీల్లో గ్రామ సభలు నిర్వహించారన్నారు. ఇవన్నీ చూడలేక జగన్ అభద్రతాభావంతో కులాల గొడవలు రేపుతున్నారన్నారు.

లడ్డూ కల్తీ జరగలేదని తన తండ్రి ముద్రగడ ఎలా అనగలుగుతున్నారో అర్ధం కావట్లేదన్నారు. గతంలో ఆయన ఉద్యమాన్ని వాడుకుని వైసీపీ అధికారంలోకి వచ్చిందన్నారు. జగన్ హామీలు నిలబెట్టుకోకపోయినా తన తండ్రి మద్దతునివ్వడం ఆశ్చర్యంగా ఉందన్నారు. అయినా జగన్ ఆయన్ను గుర్తించలేదన్నారు. అధికారంలో ఉండగా రాష్ట్రాన్ని నలుగురు రెడ్లకు అప్పగించి ఇప్పుడు అధికారం పోగానే కాపులు గుర్తొస్తున్నారా అని జగన్ ను ఆమె ప్రశ్నించారు. జగన్ కు అధికారంలో ఉంటే రెడ్లు కావాలి అధికారం పోతే కాపులు కావాలన్నారు. అంబటి రాంబాబను వాడుకుని ఏ విధంగా అల్లర్లు చేయాలని చూస్తున్నారో, అలాగే రేపు మా నాన్నగారిని కూడా వాడుకుని బలి పశువుని చెయ్యరన్న గ్యారెంటీ ఏమైనా ఉందా? అని ప్రశ్నించారు. ఇప్పటికైనా జగన్ ఉచ్చులో పడి కాపులు మరోసారి మోసపోవద్దని కోరారు.