ఈసారి అమిత్ షా పర్యటన చాలా ఇంట్రస్టింగ్... ఎందుకంటే...?

తెలంగాణ విమోచన దినోత్సవాల్లో పాల్గొనేందుకు హైదరాబాద్ వస్తున కేంద్ర హోంశాఖ మంత్రి అమిత్ షా పర్యటనలో ఆసక్తి పరిణామం చోటుచేసుకోనుంది. 17న వేడుకలు జరగనుండగా... 16న రాత్రి అమిత్ షా నగరానికి రానున్నారు. భారత బ్యాడ్మింటన్ స్టార్ పీవీ సింధుతో అమిత్ షా భేటీ కానున్నట్లు బీజేపీ వర్గాలు చెబుతున్నాయి. మర్యాదపూర్వకంగానే సింధును అమిత్ షా కలవనున్నారని వెల్లడించాయి. కానీ దీని వెనుక రాజకీయ కోణం ఉందని రాజకీయ వర్గాలు భావిస్తున్నాయి. బీజేపీకి మద్దతు ఇవ్వాల్సిందిగా సింధును అమిత్ షా కోరే అవకాశముందని ప్రచారం జరుగుతోంది. క్రీడా రంగంలో పీవీ సింధుకు మంచి పాపులారిటీ ఉంది. దేశం తరపున వివిధ టోర్నీలలో ఎన్నో పతకాలు సాధించింది. తెలుగు రాష్ట్రంలో పీసీ సింధు అంటే తెలియని వారు ఎవరూ ఉండరు. తెలంగాణలో బలపడాలని చూస్తున్న బీజేపీ.. తమ పార్టీ కోసం సింధు మద్దతు కోరే అవకాశం లేకపోలేదని ప్రచారం జరుగుతోంది. వచ్చే ఎన్నికల్లో తెలంగాణలో అధికారంలోకి వచ్చేందుకు బీజేపీ కసరత్తులు చేస్తోంది. ఈ నేపథ్యంలోనే... సినీ, క్రీడారంగాలకు సంబంధించిన ప్రముఖులతో అగ్రనేతలు భేటీ అవుతున్నారు. గతంలో అమిత్ షా హైదరాబాద్ పర్యటనకు వచ్చిన సమయంలో యంగ్ టైగర్ జూనియర్ ఎన్టీఆర్‌తో భేటీ కావడం సంచలనంగా మారింది. 'ఆర్ఆర్ఆర్' సినిమా విజయం సాధించినందుకు ఎన్టీఆర్‌ను ప్రశంసించడానికి అమిత్ షా కలిసినట్లు కాషాయ వర్గాలు బయటకు చెప్పినా... ఈ భేటీ వెనుక పెద్ద వ్యూహమే ఉందనే ఊహాగానాలు వినిపించాయి. ఆ తర్వాత బీజేపీ జాతీయ అధ్యక్షుడు జేపీ నడ్డా హైదరాబాద్ పర్యటనలో యంగ్ హీరో నితిన్‌, టీమిండియా ఉమెన్స్ టీమ్ మాజీ కెప్టెన్ మిథాలీ రాజ్‌తో భేటీ అయ్యారు. ఇలా వరుసగా సెలబ్రెటీలతో భేటీ అవుతూ వస్తుండగా.. ఇప్పుడు పీవీ సింధుతో అమిత్ షా నేరుగా సమావేశం కానుండటం కీలకంగా మారింది.  తెలంగాణ ఎన్నికల నేపథ్యంలో ఈ భేటీ మరింత ప్రాధాన్యతను సంతరించుకుంది. ఇదిలావుండగా... అమిత్ షా గత ఏడాది సెప్టెంబర్ 17 న విమోచన దినోత్సవ వేడుకల్లోనూ పాల్గొన్నారు. ఈ ఏడాది కూడా ఈ వేడుకల్లో పాల్గొనడం ద్వారా ... పార్టీకి రాజకీయంగా మైలేజి తీసుకురావాలని ప్రయత్నిస్తున్నారని తెలుస్తోంది. అదేవిధంగా... అమిత్ షా 17న పరేడ్ గ్రౌండ్‌లో జరగనున్న వేడుకల్లో పాల్గొని ప్రజలను ఉద్దేశించి ప్రసంగించనున్నారు. తెలంగాణలో ఇప్పటికే ఎన్నికల హీట్ మొదలైన క్రమంలో.. సీఎం కేసీఆర్ పై అమిత్ షా విమర్శలు చేసే అవకాశముంది. దీంతో అమిత్ షా ఏం మాట్లాడతారనే దానిపై రాజకీయ వర్గాల్లో ఉత్కంఠ నెలకొంది.