బీహార్ ఎన్నికలు - తొలి దశను మించి భారీగా పోలింగ్  - పార్టీలలో పెరిగిన ఉత్కంఠ..!

బీహార్ అసెంబ్లీ ఎన్నికల రెండో దశ పోలింగ్ మంగళవారం ఉదయం నుంచే జోరుగా సాగుతోంది. తొలి దశ సరళిలోనే రెండో విడతలోనూ ఓటర్లు ఉత్సాహంగా పాల్గొన్నారు. పోలింగ్ సరళిని బట్టి చూస్తే, సాయంత్రం ముగిసేసరికి సరికొత్త రికార్డు నమోదయ్యే అవకాశం ఉందని విశ్లేషకులు అంచనా వేస్తున్నారు.మధ్యాహ్నం 1 గంట సమయానికే 47 శాతానికి పైగా పోలింగ్ నమోదైంది. ఇదే సమయానికి తొలి దశలో నమోదైన ఓటింగ్ శాతంతో పోలిస్తే ఇది దాదాపు 5 శాతం అధికం. దీంతో రెండో దశలోనూ రికార్డు స్థాయిలో ఓట్లు పోలవుతాయన్న అంచనాలు బలపడుతున్నాయి. ఎన్నికల సంఘం అధికారిక లెక్కల ప్రకారం గయ, జమూయి, బంకా జిల్లాల్లో 50 శాతానికి పైగా ఓటింగ్ నమోదైంది. తూర్పు, పశ్చిమ చంపారన్, పూర్నియా, కతిహార్ వంటి ఇతర జిల్లాల్లోనూ 48 శాతానికి పైగా ప్రజలు తమ ఓటు హక్కును వినియోగించుకున్నారు. బెంగాల్ సరిహద్దులో ఉన్న, ముస్లిం జనాభా అధికంగా ఉండే కిషన్‌గంజ్ జిల్లాలో మధ్యాహ్నం 1 గంటకే అత్యధికంగా 51.86 శాతం పోలింగ్ నమోదవడం విశేషం.

మంగళవారం ఉదయం పోలింగ్ ప్రారంభమైనప్పటి నుంచే పలు జిల్లాల్లోని పోలింగ్ కేంద్రాల వద్ద ఓటర్లు, ముఖ్యంగా మహిళలు బారులు తీరారు. ఉదయం 9 గంటలకే దాదాపు 15 శాతం ఓటింగ్ నమోదైంది. స్వాతంత్ర్యం వచ్చిన తర్వాత బీహార్‌లో ఎన్నడూ లేని విధంగా తొలి దశలో 64.49 శాతం పోలింగ్ నమోదై, పాత రికార్డులన్నింటినీ బద్దలు కొట్టిన విషయం తెలిసిందే. ఈ రికార్డు స్థాయి ఓటింగ్ సరళి ఎన్నికలను మరింత ఆసక్తికరంగా మార్చడమే కాకుండా, రాజకీయ పార్టీలలో సైతం ఉత్కంఠను పెంచుతోంది. ఇది ప్రభుత్వ వ్యతిరేక పవనాలకు సంకేతమని ప్రతిపక్షాలు భావిస్తుండగా, నితీశ్ నేతృత్వంలోని డబుల్ ఇంజిన్ ప్రభుత్వ పాలనకు ప్రజలు ఇస్తున్న మద్దతు ఇదని అధికార కూటమి ధీమా వ్యక్తం చేస్తోంది. ఈసారి ఎన్నికల సంఘం తొలిసారిగా పోలింగ్ బూత్‌ల వద్ద వైద్య కేంద్రాలు, మొబైల్ ఫోన్ నిల్వ సౌకర్యాలు వంటివి ఏర్పాటు చేయడం కూడా చర్చనీయాంశమైంది. అయితే, ప్రత్యేక ఓటరు జాబితా సవరణ (SIR) కింద ఓటరు ధృవీకరణను చాలా హడావుడిగా పూర్తి చేశారని, ఇది ఓటర్ల హక్కులను హరించడమేనని ప్రతిపక్షాలు ఎన్నికల సంఘంపై ఆరోపణలు చేశాయి.