ఆర్థిక మంత్రి నిర్మలా సీతారామన్ కీలక ప్రకటన.. మిడిల్ క్లాస్‌కు ఊరట..!

మన దేశంలో నిర్దిష్ట ఆదాయం మించితే.. ఆదాయపు పన్ను చట్టంలోని పన్ను శ్లాబులకు అనుగుణంగా టాక్స్ చెల్లించాల్సి ఉంటుందన్న సంగతి తెలిసిందే. ఇక ప్రస్తుతం దేశంలో పాత పన్ను విధానం, కొత్త పన్ను విధానం అని రెండూ ఉన్నాయి. గత కొంత కాలంగా పాత పన్ను విధానంలో ఎలాంటి మార్పులు కూడా చేయట్లేదు. అక్కడ పన్ను రేట్లు యథాతథంగానే ఉంచుతూ వస్తోంది. ఇదే సమయంలో కొత్త పన్ను విధానంలోకి టాక్స్ పేయర్లను ఆకర్షించేందుకు ఇక్కడ మంచి బెనిఫిట్స్ అందిస్తోంది. ముఖ్యంగా 2023 బడ్జెట్ సమయంలో కొత్త పన్ను విధానంలో టాక్స్ శ్లాబుల్ని కుదించింది కేంద్రం. మరోవైపు తొలుత స్టాండర్డ్ డిడక్షన్ లేకున్నా తర్వాత తీసుకొచ్చింది. పాత పన్ను విధానంతో పోలిస్తే కొత్త విధానంలోనే ఎక్కువ పన్ను తగ్గించుకునే వెసులుబాటు ఉంది.

ఇటీవల 2024 బడ్జెట్ సమయంలో పన్ను రేట్లను తగ్గిస్తారని భావించినా.. అలా జరగలేదు. అయితే స్టాండర్డ్ డిడక్షన్ మాత్రం రూ. 50 వేల నుంచి రూ. 75 వేలకు పెంచుతున్నట్లు ప్రకటించింది. ఇంకా.. ఇదే సమయంలో టాక్స్ శ్లాబుల్లో మార్పులు చేసింది. మరో భాషలో చెప్పాలంటే మధ్య ఆదాయ వర్గం వారికి ఊరట కలిగించేలా.. పన్ను రేట్లు కుదించింది.

కొత్త పన్ను విధానంలో పన్ను మినహాయింపులు మాత్రం లేవు. ముఖ్యంగా పెట్టుబడులపై టాక్స్ బెనిఫిట్స్ పాత పన్ను విధానంలో ఉండగా.. కొత్త దాంట్లో లేవు. ఈ క్రమంలో తాజాగా.. పన్ను విధానంపై మరోసారి కీలక వ్యాఖ్యలు చేశారు కేంద్ర ఆర్థిక శాఖ మంత్రి నిర్మలా సీతారామన్. తాజాగా ఒక కార్యక్రమంలో ఆమె ప్రశ్నలకు సమాధానాలు ఇచ్చారు.భవిష్యత్తులో పన్ను రేట్లు తగ్గిస్తారా? అన్న ప్రశ్నకు.. బదులిచ్చిన నిర్మలమ్మ ఆదాయపు పన్ను సరళీకృతం చేయడం సహా దానిని తగ్గించేందుకు తాము నిరంతరం కృషి చేస్తున్నామని చెప్పుకొచ్చారు.

ఈ క్రమంలోనే ఇటీవలి కాలంలో కీలక మార్పులు చేసినట్లు వివరించారు. భవిష్యత్తులో మరింత మెరుగ్గా తీర్చిదిద్దేందుకు కృషి చేస్తామని వివరించారు. 2019 నుంచి.. ప్రత్యక్ష పన్నుల్ని సరళం చేసేందుకే ప్రయత్నించామని.. ప్రజలపై పన్ను భారం తగ్గించేందుకే కొత్త టాక్స్ విధానం తీసుకొచ్చినట్లు స్పష్టం చేశారు.

తాము తీసుకున్న చర్యల ఫలితంగానే.. 78 శాతం మంది పన్ను చెల్లింపుదారులు.. కొత్త పన్ను విధానంలోకి మారారని ఆమె చెప్పారు. ఇప్పుడు కొత్త పన్ను విధానంలో.. దాదాపు రూ. 7.75 లక్షల వరకు ఆదాయంపై పన్ను చెల్లించాల్సిన పని లేదని చెప్పారు. అదే పాత పన్ను విధానంలో ఇది రూ. 5 లక్షలుగానే ఉందని చెప్పారు. జీఎస్టీకి సంబంధించి కూడా కీలక పన్ను రేట్లు తగ్గించేదిశగా ప్రభుత్వం పనిచేస్తోందని అన్నారు.