గులాబీ వికాసమా .. హస్తం ఆధిపత్యామా... సర్వేలేం చెబుతున్నాయంటే?

రాజకీయంగా కాక పుట్టిస్తున్న తెలంగాణలో ఓటరు నాడి ఎలా ఉండబోతోంది... పోటీ ఎవరి మధ్య ఉండనుంది... ఫలితాలు ఏ విధంగా ఉండే అవకాశాలున్నాయనే అంశాలపై ఇప్పుడు తీవ్ర చర్చ జరుగుతోంది. హ్యాట్రిక్ విజయం మా  సొంతమని... వంద సీట్లు పక్కా అంటూ బీఆర్ఎస్ నేతలు గత కొన్నాళ్ళుగా గట్టిగానే జబ్బలు చరుస్తూ వచ్చారు. కానీ ఇపుడు అసలైన సమయం వచ్చేసింది. సాధారణంగా ఓటర్లు ఎన్నికల మీద పూర్తి సీరియస్ గా ఉండేది నోటిఫికేషన్ వెలువడిన తరువాతనే. అప్పుడే తన మనసులో మాటను చెబుతారు. ఎన్నికల కమిషన్ తెలంగాణతో పాటు మరో నాలుగు రాష్ట్రాల అసెంబ్లీ ఎన్నికల షెడ్యూల్ ను ప్రకటించడంతో ఇప్పుడు ఒక్కసారిగా రాజకీయ వాతావరణం వేడెక్కింది.

ఒపీనియన్ సర్వే ఫలితాలు సైతం వెలువడుతున్నాయి. ఈ నేపథ్యంలో పలు సర్వేల నివేదికలు... బీఆర్ఎస్ కి గెలుపు అంత ఈజీ కాదని తేల్చేస్తున్నాయి. ఇక ఎడ్జ్ ఏమైనా ఉందంటే అది కాంగ్రెస్ కే అని కూడా చెబుతున్నాయి. ఫేక్ సర్వేలు అని బీఆర్ఎస్ నేతలు హరీష్ లాంటి వారు కొట్టి పారేయవచ్చు కానీ కర్నాటకలో బీజేపీ అలాగే ఎకసెక్కమాడి ఇపుడు అపోజిషన్ లో కూర్చుంది. ఏబీపీ, సీ ఓటర్ సర్వే ప్రకారం చూస్తే బీఆర్ఎస్ అధికార పీఠం దక్కించుకోవాలంటే హోరాహోరీ పోరు తప్పదనే అంటున్నారు.

బీఆర్ఎస్ కంటే కూడా ఓట్లు, సీట్ల విషయంలో కాంగ్రెస్ ముందు ఉండడం ఈ సర్వే సారాంశం యొక్క విశేషం. బీఆర్ఎస్ కు 43 నుంచి 55 సీట్ల దాకా వచ్చే చాన్స్ ఉందని ... కాంగ్రెస్ కు 48 నుంచి 60 స్థానాల దాకా వచ్చే అవకాశం ఉందని ఈ సర్వే చెబుతోంది. అదేవిధంగా ప్రధానమంత్రి నరేంద్ర మోదీ, హోం మంత్రి అమిత్‌షా స్టార్ క్యాంపెయినర్లుగా ఉన్న బీజేపీ 5 నుంచి 11 సీట్లకు పరిమితమవుతుంది. ఇతరులు 5 నుంచి 11 సీట్లు గెలుచుకునే అవకాశం ఉంది. ఏబీపీ-సీఓటర్ సర్వే అంచనా ప్రకారం కాంగ్రెస్ 39 శాతం ఓట్ల షేర్‌ రాబట్టనుంది. గత ఎన్నికల్లో 28.3 శాతం ఓట్ల షేర్ ఉన్న కాంగ్రెస్ అదనంగా మరో 10.5 శాతం ఓటింగ్ పెంచుకోనుంది. ఆ తర్వాత స్థానంలో బీఆర్ఎస్ 37 శాతం ఓటింగ్ షేర్ రాబట్టుకోనుంది. ఆ ప్రకారం గత ఎన్నికల్లో కంటే ఓటింగ్ శాతం 9.4 శాతం తగ్గనుంది. బీజేపీ సైతం 16 శాతం ఓట్ల షేర్ రాబట్టుకోనుంది. గత ఎన్నికల కంటే ఇది 9.3 శాతం అధికం. ఇతరుల ఓటింగ్ శాతం 7.4 వరకూ ఉంటుంది. గత ఎన్నికల్లో ఇది 17.8 శాతంగా ఉండగా, ఈసారి 10.4 శాతం ఓటింగ్ షేర్ తగ్గనుంది. ఏదిఏమైనా బీజేపీ అధికారం అన్న మాటను మరచిపోయేలా సర్వేలు చెబుతున్నాయి. మున్ముందు బీజేపీ ఎలా సర్దుకుంటుందో చూడాల్సి ఉంటుందని అంటున్నారు. ఇక బీయారెస్ హ్యాట్రిక్ విజయం సాధించడమనేది కేసీయార్ చాణక్యం మీదనే ఆధారపడి ఉందని విశ్లేషకులు అంటున్నారు.