ఢిల్లీ లిక్కర్ కేసులో కీలక పరిణామం... సిసోడియాకు భారీ ఊరట

ఢిల్లీ మద్యం పాలసీ కేసులో అరెస్టయిన ఆమ్ ఆద్మీ పార్టీ నాయకుడు, ఢిల్లీ మాజీ మంత్రి మనీష్ సిసోడియాకు భారీ ఊరట లభించింది. సర్వోన్నత న్యాయస్థానం శుక్రవారం ఆయనకు బెయిల్ మంజూరు చేసింది. ఈడీ, సీబీఐ రెండు కేసుల్లో రూ.10 లక్షల పూచీకత్తుపై బెయిల్ ఇచ్చింది. ఫిబ్రవరి 26, 2023న అరెస్టయిన మనీష్ సిసోడియా.. గత 17 నెలల నుంచి జైల్లోనే ఉన్నారు. పలుసార్లు ఆయన వేసిన బెయిల్ పిటిషన్లను కోర్టులు తిరస్కరించాయి. చివరకు సుదీర్ఘ న్యాయ పోరాటం అనంతరం సుప్రీంకోర్టు తాజాగా ఉపశమనం కలిగించింది. అయితే, మాజీ మంత్రి తన పాస్‌పోర్ట్ సరెండర్ చేయాలని కోర్టు ఆదేశించింది. విచారణలో జాప్యం కావడం వల్లే బెయిల్ మంజూరు చేస్తున్నట్టు స్పష్టం చేసిన న్యాయస్థానం.. సాక్షులను ప్రభావితం చేయరాదని పేర్కొంది.
మనీష్ సిసోడియా బెయిల్ పిటిషన్‌పై ఆగస్టు 6న విచారణ పూర్తిచేసిన జస్టిస్ బీఆర్ గవాయ్, జస్టిస్ కేవీ విశ్వనాథన్‌ల ధర్మాసనం.. తీర్పును రిజర్వులో పెట్టింది. శుక్రవారం ఉదయం తీర్పు వెలువరించిన ధర్మాసనం.. సిసోడియాను మళ్లీ ట్రయల్ కోర్టుకు పంపితే అది న్యాయాన్ని అపహాస్యం చేయడమే అవుతుందని వ్యాఖ్యానించారు. సిసోడియా గత 17 నెలలుగా కస్టడీలో ఉన్నారని, ఇంకా విచారణ ప్రారంభం కాలేదని, దీంతో ఆయన సత్వర విచారణ హక్కును కోల్పోతున్నారని కోర్టు పేర్కొంది.
సిసోడియాకు బెయిల్‌ను సీబీఐ, ఈడీలు వ్యతిరేకించాయి. జైలు నుంచి బయటకు వస్తే ఆయన సాక్షులను ప్రభావితం చేస్తారని వాదించాయి. కానీ, న్యాయస్థానం మాత్రం వారి వాదనలను తోసిపుచ్చింది. ఢిల్లీ మద్యం పాలసీ కేసులో 2023 ఫిబ్రవరి 26న సిసోడియాను సీబీఐ అరెస్ట్ చేయగా... మనీల్యాండరింగ్ ఆరోపణలతో అదే ఏడాది మార్చి 9న ఈడీ అదుపులోకి తీసుకుంది. అప్పటి నుంచి ఆయన తీహార్ జైల్లోనే ఉన్నారు. అయితే, విచారణ సమయంలో కేసు దర్యాప్తు ఎప్పటిలోగా పూర్తవుతుందని సీబీఐ, ఈడీలను న్యాయస్థానం ప్రశ్నించింది. ఈ కేసుల్లో 493 మంది సాక్షులను విచారించారని, ఇంకా ఎన్నాళ్లు పడుతుందని నిలదీస్తూ ... ఈ మేరకు తీర్పునిచ్చింది. కాగా సిసోడియాకు బెయిల్ రావడంతో ఆప్ కార్యకర్తలు సంబరాలు చేసుకుంటున్నారు.