వాయనాడ్ బరిలో ప్రియాంక – దక్షిణాదిలో పార్టీ బలోపేతం కోసమే..!

రాజీవ్ గాంధీ కుమార్తె . .. రూపు రేఖల్లో ఇందిరాగాంధీలా ఉండే ప్రియాంకా గాంధీ ప్రత్యక్ష ఎన్నికల బరిలోకి దిగుతున్నారు. చాలా కాలంగా ఆమె పరోక్ష రాజకీయాల్లో ఉన్నారు. కాంగ్రెస్ పార్టీ తరపున ప్రచారాలు చేస్తున్నా నేరుగా ఎన్నికల బరిలోకి ఎప్పుడూ దిగలేదు. తాజాగా వాయనాడ్ ఉప ఎన్నికల బరిలో దిగాలని ప్రియాంక నిర్ణయించుకున్నారు. కాంగ్రెస్ పార్టీ కూడా టిక్కెట్ ప్రకటించింది.

ప్రియాంకా గాంధీ ఇప్పటిదాకా చట్ట సభలలో అడుగు పెట్టలేదు. ఆమె తన తల్లి వదిలేసిన రాయబరేలీ నుంచి పోటీ చేస్తారని అనుకున్నారు. కానీ అక్కడ నుంచి రాహుల్ గాంధీ పోటీ చేశారు. ఇక రాహుల్ వదిలేసిన అమేధీ నుంచి ప్రియాంక పోటీ పడుతుందని అనుకుంటే శర్మ అనే కాంగ్రెస్ విధేయుడికి టికెట్ ఇచ్చి గెలిపించుకున్నారు. ఈ నేపథ్యంలో రాహుల్ 2019, 2024లో వరసగా రెండు సార్లు గెలిచిన వయనాడ్ ఎంపీ సీటు ఖాళీ అయింది. రాహుల్ గాంధీ రాయబరేలీ ఉంచుకుని వయనాడ్ త్యాగం చేశారు. అదిపుడు చెల్లెమ్మకు అంకితం అవుతోంది.

పైగా ఉత్తరాదిన అన్న .. దక్షిణాదిన చెల్లెమ్మ అన్న లెక్కలు కూడా సరిపోతాయని అంటున్నారు. కేరళలోని వాయనాడు కాంగ్రెస్ కి కీలక ప్రాంతం. మొన్న జరిగిన ఎంపీ ఎన్నికల్లో ఎల్డీఎఫ్ ని పక్కన పెట్టి మరీ కాంగ్రెస్ నాయకత్వంలోని యూడీఎఫ్ మెజారిటీ సీట్లు గెలుచుకుంది. అసెంబ్లీ ఎన్నికలు వస్తే కనుక కాంగ్రెస్ అక్కడ అధికారంలోకి వస్తుందని అంచనాలు ఉన్నాయి.

ఇక దేశంలో కూడా ఇండియా కూటమి హవా బాగానే ఉంది. దాంతో భవిష్యత్తు రాజకీయాలను దృష్టిలో పెట్టుకుని ప్రియాంకా గాంధీ ఎన్నికలలో పోటీకి సిద్ధపడుతున్నారని అంటున్నారు. ప్రియాంకాగాంధీ ఈ ఉప ఎన్నికల్లో గెలవడం ఖాయమని అంటున్నారు. గెలిచిన తరువాత ప్రియాంక పార్లమెంట్ లో అన్న రాహుల్ పక్కన చేరి మోడీకి మరో సవాల్ గా మారుతారా అన్న చర్చ కూడా ఉంది.

అదేవిధంగా కాంగ్రెస్ లో కూడా లెక్కలు మారుతాయని అంటున్నారు. నవంబర్ 13న వాయనాడ్ లో ఉప ఎన్నిక జరుగుతుంది. 23న ఫలితాలు వస్తాయి. వాయనాడ్ లో ప్రియాంక గాంధీ గెలుపొంది కేవలం ఎంపీ అవడమే ఆమె టార్గెట్ కాదు. దక్షిణాది మొత్తం కాంగ్రెస్ పార్టీని చక్కదిద్దుకునే ప్రయత్నాలను ఆమె చేయనున్నారు. కాంగ్రెస్ పార్టీకి దక్షిణాది చాలా ముఖ్యం. వచ్చే పార్లమెంట్ ఎన్నికల్లో నాలుగోసారి ఓడిపోకుండా ఉండాలంటే… కర్ణాటక, తెలంగాణలో పార్టీని చక్కదిద్దుకోవాలి. ఏపీలో వచ్చిన అవకాశాల్ని వినియోగించుకోవాలి. వయనాడ్ ఎంపీ హోదాలో ఇక ప్రియాంక ఆ ప్రయత్నాలు చేస్తారని అనుకోవచ్చు. సో.. వాయనాడ్ ఎన్నికతో కాంగ్రెస్ పార్టీకి గాంధీల ఆడపడుచు ఏ రకమైన జోష్ ని తెస్తారో వేచి చూడాల్సిందే.