అలాంటి వారికి ఎస్సీ రిజర్వేషన్లు రద్దు - సుప్రీంకోర్టు సంచలన తీర్పు..!

భారత సర్వోన్నత న్యాయస్థానం రిజర్వేషన్ల అంశంపై ఒక చారిత్రాత్మక, సంచలన తీర్పును వెలువరించింది. షెడ్యూల్డ్ కులాలకు (SC) చెందిన వ్యక్తులు క్రైస్తవ మతంలోకి మారినట్లయితే, వారు తమ ఎస్సీ రిజర్వేషన్ హక్కులను కోల్పోతారని సుప్రీంకోర్టు స్పష్టం చేసింది. రాజ్యాంగబద్ధంగా లభించే ఈ ప్రయోజనాలు కేవలం హిందూ, బౌద్ధ, సిక్కు మతాల్లోని దళితులకు మాత్రమే పరిమితమని పేర్కొంటూ, గతంలో ఆంధ్రప్రదేశ్ హైకోర్టు ఇచ్చిన తీర్పును అత్యున్నత న్యాయస్థానం సమర్థించింది.

ఈ కేసు విచారణ సందర్భంగా సుప్రీంకోర్టు కీలక వ్యాఖ్యలు చేసింది. "క్రైస్తవ మతంలో కుల వ్యవస్థకు తావులేదు" అని ధర్మాసనం స్పష్టం చేసింది. ఎస్సీ రిజర్వేషన్లు అనేవి హిందూ సమాజంలోని అంటరానితనం, కుల వివక్ష వంటి సామాజిక రుగ్మతల ఆధారంగా కల్పించబడ్డాయని, క్రైస్తవం వంటి మతాల్లో ఇవి ఉనికిలో లేనందున మత మార్పిడి తర్వాత ఆ హక్కులను క్లెయిమ్ చేయడం సాధ్యం కాదని న్యాయస్థానం తేల్చి చెప్పింది. ఆంధ్రప్రదేశ్‌లో ఒక నియామక ప్రక్రియకు సంబంధించి తలెత్తిన వివాదంపై ఏపీ హైకోర్టు గతంలో స్పందిస్తూ.. క్రైస్తవంలోకి మారిన వారు ఎస్సీ కోటా కింద ప్రయోజనాలు పొందలేరని తీర్పునిచ్చింది. ఈ నిర్ణయాన్ని సవాల్ చేస్తూ దాఖలైన పిటిషన్లను విచారించిన సుప్రీంకోర్టు, హైకోర్టు అంచనా సరైనదేనని ధృవీకరించింది. రాజ్యాంగంలోని 1950 నాటి ప్రెసిడెన్షియల్ ఆర్డర్‌ను ఈ సందర్భంగా కోర్టు ఉటంకించింది.

ప్రస్తుత చట్టాల ప్రకారం.. షెడ్యూల్డ్ కులాల జాబితాలో ఉండాలంటే ఆ వ్యక్తి హిందూ, సిక్కు లేదా బౌద్ధ మతస్థుడై ఉండాలి. మతం మారిన తర్వాత సామాజిక హోదాలో మార్పు వస్తుందని, అందువల్ల పాత రిజర్వేషన్లు వర్తించవని ఈ తీర్పు ద్వారా స్పష్టమైంది. ఈ నిర్ణయం దేశవ్యాప్తంగా మత మార్పిడి చేసుకున్న వేలాది మంది రిజర్వేషన్లపై ప్రభావం చూపే అవకాశం ఉందని న్యాయ నిపుణులు విశ్లేషిస్తున్నారు.