ఐపీఎస్ పూరన్ కుమార్ ఆత్మహత్య కేసులో సంచలన మలుపు - మరో పోలీసు అధికారి ఆత్మహత్య..!

హర్యానా పోలీసు శాఖను వరుస ఆత్మహత్యలు కుదిపేస్తున్నాయి. సీనియర్ ఐపీఎస్ అధికారి, అదనపు డీజీపీ (ఏడీజీపీ) వై. పూరన్ కుమార్ ఆత్మహత్య ఉదంతం మరువక ముందే, మరో పోలీసు అధికారి ప్రాణాలు తీసుకోవడం సంచలనం రేపుతోంది. అయితే, ఈ రెండో ఆత్మహత్య కేసులో వెలుగు చూసిన ఒక వీడియో, పూరన్ కుమార్ కేసును ఊహించని మలుపు తిప్పింది. మరణించిన రెండో అధికారి, చనిపోయే ముందు రికార్డు చేసిన వీడియోలో ఏడీజీపీ పూరన్ కుమార్‌పై తీవ్ర అవినీతి ఆరోపణలు చేయడం కలకలం రేపుతోంది.

గత వారం చండీగఢ్‌లోని తన నివాసంలో ఏడీజీపీ వై. పూరన్ కుమార్ ఆత్మహత్య చేసుకున్న విషయం తెలిసిందే. తన చావుకు 16 మంది సీనియర్ ఐఏఎస్, ఐపీఎస్ అధికారుల కులపరమైన వివక్ష, మానసిక వేధింపులే కారణమంటూ ఆయన ఒక సూసైడ్ నోట్ కూడా రాశారు. ఈ ఘటనపై విచారణ కొనసాగుతుండగానే, మంగళవారం రోథక్‌లో మరో పోలీసు అధికారి తన సర్వీస్ తుపాకీతో కాల్చుకుని ప్రాణాలు తీసుకున్నారు. అయితే, ఆత్మహత్యకు ముందు ఆయన ఒక వీడియోను రికార్డు చేశారు. ఆ వీడియోలో, ఇటీవల మరణించిన ఏడీజీపీ పూరన్ కుమార్ ఒక అవినీతిపరుడని, ఆయన అక్రమాలకు పాల్పడ్డారని తీవ్ర ఆరోపణలు చేశారు. ఈ వీడియోను స్వాధీనం చేసుకున్న పోలీసులు, అందులోని ఆరోపణలు పూరన్ కుమార్‌కు సంబంధించినవేనని ధృవీకరించారు. దీంతో, వేధింపుల కారణంగా ఆత్మహత్య చేసుకున్న అధికారిగా భావిస్తున్న పూరన్ కుమార్ కేసులో కొత్త కోణం వెలుగులోకి వచ్చింది.

ఈ పరిణామాల మధ్య, కాంగ్రెస్ పార్టీ నేత రాహుల్ గాంధీ మంగళవారం చండీగఢ్‌లో పూరన్ కుమార్ భార్య, కుమార్తెలను పరామర్శించారు. వారికి తన మద్దతు తెలిపారు. ఈ భేటీ జరిగిన కొన్ని గంటల్లోనే రోథక్‌లో మరో అధికారి ఆత్మహత్య చేసుకోవడం, ఏడీజీపీపై ఆరోపణలు చేయడం గమనార్హం. ఈ వరుస ఘటనలపై హర్యానా పోలీసులు కేసు నమోదు చేసి దర్యాప్తు చేస్తున్నారు. ఈ ఆత్మహత్యల పరంపర, వీడియో ఆరోపణలు హర్యానా పోలీసు శాఖలో అంతర్గత కుమ్ములాటలు, అవినీతి ఏ స్థాయిలో ఉన్నాయో తెలియజేస్తున్నాయని విశ్లేషకులు అభిప్రాయపడుతున్నారు.