చిచ్చురేపిన కళ్యాణ్ రామ్ కామెంట్స్... సోషల్ మీడియాలో వైరల్.

ఏపీలో రాజకీయాలు ఇప్పుడు హాట్ హాట్ గా మారాయి. అధికారాన్ని నిలబెట్టుకోడానికి వైసీపీ, అధికారంలోకి రావాలని టీడీపీ – జనసేన పార్టీలు కసరత్తులు ప్రారంభించాయి. ఈ క్రమంలో దివంగత హరికృష్ణ తనయులు, సినిమా హీరోలు కల్యాణ్ రామ్, జూనియర్ ఎన్టీఆర్ రాజకీయపరంగా ఎటువైపు ఉంటారనే విషయం చర్చకు వచ్చింది. హీరో కల్యాణ్ రామ్ కొత్త సినిమా డెవిల్ విడుదలకు సిద్ధమైంది. ఈ సందర్భంగా ఆయన మీడియాకు వరుస ఇంటర్వ్యూలిస్తున్నారు. ఆ ఇంటర్వ్యూలలో సినిమా టాపిక్ తో పాటు రాజకీయాలు కూడా తెరపైకి వస్తున్నాయి. ఈ క్రమంలో ఈ విషయం చర్చకు వచ్చింది. ఏపీ రాజకీయాల్లో మీరు ఎటువైపు ఉంటారు... మీ కామెంట్ ఏమిటనే ప్రశ్నకు కళ్యాణ్ రామ్ ఆసక్తికర సమాధానం ఇచ్చారు. ఆ సమాధానం ఇప్పుడు సోషల్ మీడియాలో వైరల్ గా మారింది. దివంగత నందమూరి తారక రామారావు మనవళ్లుగా కల్యాణ్ రామ్ కానీ, జూనియర్ ఎన్టీఆర్ కానీ ... టీడీపీకే  సపోర్ట్ చేయాలి. కానీ కల్యాణ్ రామ్ తన ఇంటర్వ్యూలో నేరుగా ఆ మాట చెప్పలేదు. ఏ పార్టీ ఉంటామో ఆలోచించి చెబుతామని అన్నారు. దీంతో టీడీపీ శ్రేణులు కళ్యాణ్ రామ్ వ్యాఖ్యలపై ఫైర్ అవుతున్నారు. ఇందులో ఆలోచించడానికేముందని... కల్యాణ్ రామ్ ఏపీ రాజకీయాల్లో ఏ పార్టీకయినా సపోర్ట్ చేయాల్సి వస్తే.. కచ్చితంగా అది టీడీపీ అయి ఉండాలని వారు అంటున్నారు. ఏ పార్టీ వైపు ఉంటామనే విషయమై తానూ తన తమ్ముడు జూనియర్ ఎన్టీఆర్ చర్చించుకుని ఓ నిర్ణయానికి వస్తామని ఎందుకు చెప్పారనేది చర్చనీయాంశంగా మారింది. అంతగా చర్చించాల్సిన అంశాలేముంటాయి... పోనీ చర్చించాక అయినా టీడీపీని కాదని వేరే పార్టీకి వారు మద్దతు తెలపగలరా... ఈ ప్రశ్నలతో సోషల్ మీడియా హోరెత్తిపోతోంది. ఈ నేపథ్యంలో ఇంతకీ చంద్రబాబుకు నందమూరి ఫ్యామిలీ సపోర్ట్ ఉందా లేదా..  అనే దాకా చర్చలు సాగుతున్నాయి. ఆ మధ్య చంద్రబాబు వెక్కివెక్కి ఏడ్చినప్పుడు.. నందమూరి ఆడపడుచును నిండు సభలో అవమానించారంటూ కుటుంబమంతా ప్రెస్ మీట్ పెట్టింది. జూనియర్ ఎన్టీఆర్ లాంటివారు విడిగా వీడియోలు విడుదల చేశారు. ఇటీవల చంద్రబాబు జైలుకెళ్లినప్పుడు కూడా ఎక్కడా ఎలాంటి సందడి లేదు. బాలకృష్ణ, రామకృష్ణ ఆయన వెంట తిరిగినా, వారే మొత్తం కుటుంబం కాదు. పురంధరేశ్వరి తాపత్రయం చూస్తున్నా.. ఆమెను నందమూరి లెక్కలో వేసుకోలేం, దగ్గుబాటి ఫ్యామిలీ కోడలిగా చూడాల్సిందే. నందమూరి ఫ్యామిలీ పేరు బలంగా చెప్పుకునేది హరికృష్ణ కుటుంబం ఒక్కటే. హరికృష్ణ తనయులు కల్యాణ్ రామ్, జూనియర్ ఎన్టీఆర్ మాత్రమే మూడోతరంలో ప్రజాభిమానం పొందారు. తాతకు తగ్గ మనవళ్లుగా సినిమాల్లో రాణిస్తున్నారు. మరి వారిద్దరి మద్దతు చంద్రబాబుకి ఉంటుందా... ఉండదా అనే కోణంలో చర్చలు జరుగుతున్నాయి. ఈ అంశంపై వైసీపీ- టీడీపీ కామెంట్ల ను పక్కన పెడితే... కల్యాణ్ రామ్ వ్యాఖ్యలపై తీవ్ర చర్చ జరుగుతోంది. దీనిపై అధికారికంగా ఇంకా ఎవరూ స్పందించలేదు. అటు టీడీపీ, ఇటు వైసీపీ సానుభూతిపరులు మాత్రం ఒకరిపై మరొకరు కామెంట్ల వర్షం కురిపించుకుంటున్నారు.