లోకేష్ శంఖారావం యాత్ర పునః ప్రారంభం... ఈసారి హిందూపురం నుంచి

టిడిపి జాతీయ ప్రధాన కార్యదర్శి  లోకేష్ మరోసారి ప్రజల మధ్యకు రానున్నారు. ఏపీలో జరగబోయే ఎన్నికల్లో గెలుపే లక్ష్యంగా…ప్రస్తుత వైసీపీ సర్కారు పాలనను ఎండగడుతూ చేపడుతున్న శంఖారావం యాత్రను మరోమారు ప్రారంభించ బోతున్నారు. రాయలసీమలో పార్టీ కేడర్ ను సమాయత్తం చేయడానికి ఈ నెల 7న హిందూపురం నుంచి ఈ యాత్రకు శ్రీకారం చుడుతున్నారు. అసెంబ్లీ ఎన్నికలను ఏ విధంగా ఎదుర్కోవాలనే అంశంపై కేడర్ కు యువనేత దిశానిర్దేశం చేస్తారని పార్టీ నేతలు వివరించారు. ఈ సందర్భంగా మన టీడీపీ, బాబు ష్యూరిటీ - భవిష్యత్తుకు గ్యారంటీ కార్యక్రమాల అమలులో మెరుగైన పనితీరు కనబర్చిన కార్యకర్తలతో భేటీ అయి వారికి ప్రశంసాపత్రాలను అందజేస్తారు. తొలివిడతలో ఉత్తరాంధ్రలోని 31 అసెంబ్లీ నియోజకవర్గాల్లో నిర్వహించిన ఈ కార్యక్రమం కేడర్ లో నూతనోత్సాహాన్ని నింపింది. ఈ నేపథ్యంలో శంఖారావం మలివిడత యాత్రను తన మామ,  సినీ హీరో నందమూరి బాలకృష్ణ ప్రాతినిధ్యం వహిస్తున్న హిందూపురం నుంచి ప్రారంభించనున్నారు. తొలిరోజు అయిన 7వ తేదీ ఉదయం హిందూపురం, మధ్యాహ్నం మడకశిర, సాయంత్రం పెనుకొండ నియోజకవర్గాల్లో శంఖారావం సభలు నిర్వహిస్తారు. ఈ నెల 8 న ఉదయం పుట్టపర్తి, మధ్యాహ్నం కదిరి సభలకు లోకేష్ హాజరవుతారు. శివరాత్రి నేపథ్యంలో 9న యాత్రకు తాత్కాలిక విరామం ఉంటుంది. తిరిగి ఈ నెల 10  నుంచి యాత్ర యథావిధిగా కొనసాగనుందని పార్టీ అగ్రనేతలు తెలిపారు.