షోయబ్ తో కొన్ని నెలల కిందటే ఆ బంధం తెగిపోయింది

పాకిస్థాన్ మాజీ క్రికెటర్ షోయబ్ మాలిక్‌ ఆ దేశ నటి సనా జావెద్‌ను వివాహం చేసుకున్నాడన్న వార్త  ఒక్కసారిగా వైరల్ అయిన విషయం తెలిసిందే. ఇటు క్రికెట్, అటు టెన్నిస్ వర్గాల్లో తీవ్ర చర్చకు కారణమైంది. హైదరాబాద్ టెన్నిస్ స్టార్ సానియా మీర్జా-షోయబ్ మాలిక్ వివాహ బంధం ముగిసిపోనుందని, వారిద్దరూ విడాకుల ఆలోచనల్లో ఉన్నారని గత కొన్ని నెలలుగా వార్తలు షికారు చేసిన సంగతీ తెలిసిందే. నటి సనా జావెద్‌ను వివాహం చేసుకోవడం ద్వారా షోయబ్ ఆ వార్తలను నిజం చేశాడు. సనా జావెద్‌ను షోయబ్ పెళ్లి చేసుకున్నాడన్న వార్త వైరల్ కావడంతో ఇంతకీ ఆమె ఎవరన్న ప్రశ్న అందరిలోనూ తలెత్తింది. 1993 జూన్ 6న సౌదీ అరేబియాలోని జెడ్డాలో జన్మించిన సనా జావెద్...  ఉర్దూ టెలివిజన్ చానల్‌ ద్వారా గుర్తింపు తెచ్చుకుని తర్వాత నటిగా మారింది. ఆమె పూర్వీకులు మన హైదరాబాద్ వారే. దేశ విభజన సమయంలో పాకిస్థాన్ వెళ్లిపోయి అక్కడే స్థిరపడ్డారు. 2012లో ‘షెహర్-ఇ-జాత్’ అనే సీరియల్‌లో నటించి గుర్తింపు తెచ్చుకున్న సనా.. ఆ తర్వాత పలు సీరియళ్లలో నటించి మంచి నటిగా గుర్తింపు తెచ్చుకుంది. ఆ తరువాత బిగ్ స్క్రీన్ పైనా, మోడలింగ్ లోనూ ఆమె కెరీర్ కొనసాగింది. 2020లో టెలివిజన్ రియాలిటీ గేమ్ షో ‘జీతో పాకిస్థాన్ లీగ్‌’లో ఇస్లామాబాద్ డ్రాగన్స్‌కు కెప్టెన్‌‌గానూ వ్యవహరించింది. 2020 అక్టోబరులో సినీ గాయకుడు, గేయ రచయిత ఉమైర్ జస్వాల్‌ను వివాహం చేసుకుంది. అయితే, గత ఏడాది చివర్లో వీరిద్దరూ విడిపోయారు. ఆ తర్వాత ఆమెకు షోయబ్ మాలిక్‌తో పరిచయం ఏర్పడింది. ఆ తర్వాత ఇద్దరూ పలు షోలలో కలిసి కనిపించడంతో వీరిద్దరి మధ్య ఏదో ఉందన్న ప్రచారం జరిగింది. గత ఏడాది సనా బర్త్ డే సందర్భంగా ఆమె ఫొటోను షేర్ చేసిన షోయబ్ ‘హ్యాపీ బర్త్ డే బడ్డీ’ అని పోస్టు పెట్టడంతో ఆ వార్తలకు బలం చేకూరింది. ఇప్పుడు ఇద్దరూ పెళ్లి చేసుకుని ఒక్కటయ్యారు. ఇదిలాఉండగా షోయబ్ మాలిక్‌తో విడాకుల వ్యవహారంపై సానియామీర్జా కుటుంబం స్పందించింది. పాకిస్థాన్ నటిని పెళ్లాడిన షోయబ్ జీవితం సాఫీగా సాగాలని ఆకాంక్షిస్తూ.. షోయబ్‌తో సానియా విడాకులు ఎప్పుడు తీసుకున్నదీ వెల్లడించింది. వీరిద్దరూ కొన్ని నెలల క్రితమే విడిపోయినట్టు స్పష్టం చేసింది. సానియా ఇప్పటివరకు తన వ్యక్తిగత జీవితంలో గోప్యత పాటించిందని, కానీ ఇప్పుడు ఓ విషయాన్ని బయటపెట్టాల్సిన అవసరం ఉందని పేర్కొంది. సానియామీర్జా, షోయబ్ కొన్ని నెలల క్రితమే విడాకులు తీసుకున్నట్టు స్పష్టం చేసింది. షోయబ్ కొత్త ప్రయాణం సంతోషంగా సాగాలని సానియా ఆకాంక్షించినట్టు తెలిపింది. తమ గోప్యతను గౌరవించి, ఊహాగానాలకు దూరంగా ఉండాలని సానియా అభిమానులను కుటుంబం అభ్యర్థించింది.